Hmarchhak tana ni lungchhiatthlak ber a ni: Mukul Sangma

Meghalaya chief minister hlui, Dr Mukul Sangma chuan Lok Sabha-a sawizui hlawh tak, Citizenship (Amendment) Bill pass a ni chu  hmarchhak tana ni lungchhiatthlak ber a ni, a ti. Bharatiya Janata Pary (BJP) kaihhruai National Democratic Alliance (NDA) sorkar chuan hmarchhak biala tribal hnam hrang hrangten an duh lohna an lantir leh, an ngenna chu a hriatsak duh lo a ni, tiin a sawi. 

Congress hruaitu Dr Sangma chuan Bill duh lohna lantir hian badge dum bela lungawi lohna lantir chhunzawm zel an tum thu a sawi bawk. Tura Congress Bhavan-a press meet a neihnaah, Dr Sangma chuan CAB pharh lo turin kawng hrang hrangin nawrh pawh huaihawt a ni a, mahse NDA sorkar chuan kalpui luiin Lok Sabha-ah a pass lui ta tho a ni, a ti. He bill hi Act a siam ngei pawh an tumruh hle, tiin a sawi. "Hmarchhak mipuite chuan sorkarin an hriatthiam sak turin an duhdante pawh an lantir a, hengte hi sorkar chuan a ngaihven sak theih reng laiin kawng dang a thlang ta zawk a ni," a ti. Sorkar laipuia bill duh lohna thlentu, hmarchhaka civil society leh political party aiawh zingah pawh a tel thu leh, bill dodalna kawngah pawh an inlungrual thu a sawi. 

"Sorkar laipuiin CAB pharh a nih hmain hmarchhaka stakeholder hrang hrangte a kawm kualte kha lemchanna mai a ni tih kan hria a ni. ILP leh Sixth Schedule hmangin hmarchhak mipuite venhim an ni ang tiin an sawi a, mahse ngaihtuahna pangngai aṭang pawhin citizen chi hnih a awm thei ngai lo tih kan hria," tiin Sangma chuan a sawi bawk. CAB chuan hmarchhak pumah nghawng pawi tak a nei dawn ngei a, mahse hmarchhak bial mi zawng zawng chu, eng party mi leh sa pawh ni se he bill dodalna kawngah chuan an inlungrual zel tur thu a sawi.