Manipur : Governor-in Meitei mi thah thubuai NIA kutah a hlan

Manipur governor Ajay Kumar Bhalla chuan pawisawi lo Meitei mi pakhat, Mayanglambam Rishikanta Singh thah thubuai chu National Investigation Agency (NIA) hnenah uluk leh chipchiar zawka chhui zuina nei turin Ningani khan a hlan.

Governor chuan he thu hi Ningani chawhnu lam khan MLA Thokchom Lokeshwar Singh leh Kangujam Ranjit Singh-te nen Mayanglambam Rishikanta Singh thah chungchanga Joint Action Committee an neih ṭumin a sawi a ni. Ningani zana Lok Bhavan thuchhuah chuan, Governor tlawhtute hian memorandum an theh lut tih a tarlang.

Memorandum-ah hian Nilaini zana Churachandpur district-a Kuki helpawl nia rinhlelhten an rukbo hnua an kah hlum, Mayanglambam Rishikanta Singh thihna chungchangah an lungawi loh thu an thlen bakah, a ṭul anga hmalak sak turin an ngen bawk. Governor chuan Rishikanta Singh thah a ni chu pawi a tih thu leh a chhungte a tuarpui takzet thu a sawi. Chhuizuina chipchiar zawk nei turin thubuai chu NIA kutah hlan a ni tawh tih sawiin, pawikhawihtute man tur hian Nilaini zan aṭang khan state leh central force-ten beihpui an thlak nghal tih a sawi.