Assam : PM Modi-a'n February 14-ah state tlawh maithei

Assam chief minister Himanta Biswa Sarma chuan Ningania social media-a a live-ah prime minister Narendra Modi-a'n February 14 hian Assam a tlawh maithei tih a sawi.

PM hian Assam hi a tlawh thei a nih chuan, hunrei tak chhung mipui lo nghah tawh, Guwahati leh North Guwahati thlunzawmna tur lei dawh a hawng dawn a, Indian Institute of Management (IIM) Guwahati campus a hawn dawn bakah, mipui vantlang veivahna atana hman tur electric bus 100 a vailiam bawk ang.

CM Sarma chuan February 14-a Prime Minister-in state a tlawh thei a nih chuan, hemi ni vek hian Moran national highway-a advanced landing facility hmang thlawhtheihna bik hmang tura an ngen thu a sawi. Sarma chuan Prime Minister hian February thla tawp lamah a vawi hnihna atan state a tlawh leh dawn tih tarlang bawkin, he hunah hian Modi chuan Kokrajhar-Gelephu railway line, Assam leh Bhutan inthlunzawmna tihchangtlunna tur lungphum a phum dawn tih a tarlang.

Prime Minister hi Kokrajhar-a railwaycoach manufacturing factory leh, Rs vbc 22,000 senna tur Guwahati leh Silchar thlunzawmna tur express highway lungphum phum tura beisei a ni. Prime Minister-in state a tlawh tur chungchangah state sorkar leh sorkar laipuiin inbiakna an nei mek tih Assam CM chuan a sawi.

Union home minister Amit Shah chuan January 30 hian Dibrugarh a tlawh dawn a, Assam legislative assembly complex pahnihna tur lungphum phumin, vantlang inkhawmah thu a sawi bawk dawn a ni.