Meghalaya : Trainee-ten Skills Meghalaya project exercise zo fel

Meghalaya State Skill Development Society (MSSDS) leh Meghalaya Basin Management Agency (MBMA) thawk dunin South West Garo Hills-a Purakhasia block hnuai Dinapara-a Dondima IVCS Ltd warehouse thar an siam chu hawn niin, certificate semna hun buatsaih nghal a ni.

He hunah hian Skills Meghalaya project hnuaia 'agro-processing and loinloom and handloom' training zo tawhte chu certificate hlan an ni. He hmalakna pawimawh tak hi state ṭhalaite industry kaihhnawiha thiamna pek leh hna thawh tur an hmuh theihna atan a ṭangkai dawn hle a ni.

Salmanpara MLA Ian Botham K Sangma chuan, training zo fel tawhte chu mahnia dinchhuah theihna tur kutkawih eizawnna ngaihtuah chhunzawm turin a fuih a, sorkar hna in mi zawng zawng a daih loh thu leh sector hrang hrang zingah agro-processing chu eizawnna atan a ṭhat tawk thu a sawi.

Dondima IVCS (Integrated Village Cooperative Society) hi kum 2019 November 6 khan din a ni a, khaw pangaah huang zauh niin member pawh an pung chak hle a ni. South West Garo Hills-a IVCS lian ber niin, cashew, arecanut leh aroma oil distillation processing unit an nei a ni. Kum kalta khan CM ELEVATE Scheme hnuaiah ton 200 warehouse pek a ni. Scheme hi economy tihchakna tura hmalakna niin, agro-processing trainee 30 zinga 21 chuan warehouse hawn tharah hian hna an hmu tawh a ni.