Tripura : CPI(M)-in Shimultala-a buaina chhuak SIT chhui chian phut

Tripura-a eptu party lian ber, CPI(M) chuan Ningani khan Tripura-a Fatikroy assembly bial Shimultala-a kumin January 10-a tualchhung buaina chhuak chhui chiang turin Special Investigation Team (SIT) din an phut. Hei bakah LOP Jitendra Chaudhury chuan buaina chhuak chungchangah hian point ruk awmna charter of demand a pholang bawk.

CPI(M) state headquarters-a press conference neihah, party politburo member ni bawk Chaudhury chuan chief secretary J.K. Sinha hnenah senior police officer kaihhruai SIT din turin a ngen tih a sawi a, uluk taka chhui chianna neih a nih hnuah pawikhawihtute hriatchhuah leh hrem an nih theih nan hma lak sak turin a ngen tih a tarlang.

He buaina hi Fatikroy police station thuneihna hnuaia thleng niin, tualchhung festival-a subscription lakkhawm chungchangah pawl pahnih inkarah buaina hi a chhuak a ni. Chaudhury chuan he thil thlengah hian mi paruk aia tlem loin hliam an tuar tih sawiin, chhungkaw 15 velin harsatna an tawk tih a sawi.

An thil phut zingah helai huam chhunga temporary police picket din pawh telin, Muslim chhungkaw zinga harsatna tawk, a bik takin buaina punlun zel tur hlauhthawna avanga chenna in chhuahsan leh hmundanga tlanchhiate him taka an lo let leh theihna turte pawh a tel a ni. Chaudhury chuan buaina chhuah aṭanga ni 10 chuang a liam hnuah pawh boruak a la ralmuang lo tih sawiin, venhimna nasa zawka kalpui a ṭul tih a tarlang.