NESO bandh huaihawtin thlawp a hlawh

North East Students' Organisation (NESO) huai­hawtin nimin khan hmar­chhak state hrang hrangah Citizenship (Amendment) Bill duh lohna lantirin darkar 11 awh North East bandh huaihawt a ni. 

Bandh hi zing dar 5 aṭangin tlai dar 4 thleng huaihawt a ni. He bandh hi political party leh civil society organisation hrang hrangten an thlawp. Assam, Arunachal Pradesh, Meghalaya, Mi­zoram leh Tripura-ah total bandh hi huaihawt a ni a, Nagaland-ah chuan Hornbill Festival neih lai a nih avangin hman a ni ve lo a, mahse Governor chenna in kawtah lungawi lohna lantir a ni.  

Manipur-ah chuan home minister Amit Shah-a'n Manipur-ah Inner Line Permit (ILP) system hman a nih tur thu a puan avangin bandh hi ṭhulh a ni thung. NESO bandh huaihawt vang hian state ṭhenkhatah university examination neih hun tur pawh sawn a ngaih phah. 

Assam-ah chuan bandh huaihawt hian rel leh motor service a tikhaihlak nasa hle. Guwahati-a Secretariat leh Assembly building bulah nawrh huaihawt leh security force-te an innawr buai deuh bawk. Maligaon area-ah sorkar bus chu lunga tawng a nih bakah scooter pakhat hal a ni. Dibrugarh district-ah pawh bandh huaihawttute leh CISF te intibuaiin mi pathumin hliam an tuar. Assam BJP  president Ranjit Kumar Das chu Guwahati aṭanga Dispur a pan tur chu nawrh huaihawtte hian Six Mile flyover bulah lungin an lo tawng a, an lo aukhum bawk. Hei vang hian a motor pawh hi tlan tlang ngam loin a tlan kir leh a ni. He hmunah bawk hian Morigaon MLA Rama­kanta Dewri convoy pawh beih a ni bawk a, anni pawh an tlan kir leh a ni.