Nagaland: Sorkar sikul 34 khar dawn

Nagaland sorkar chuan sorkar primary leh middle sikul 34, zirlai naupang awm lohna leh zirna kalpui lohnate chu khar turin thupek a chhuah. Hemi rual hian sikul dang 17 zawmkhawm chu remtiin, middle sikul pasarih chu high sikulah a hlangkai bawk. Hei hi state puma school education network siamṭhatna kalpui mek peng pakhat a ni.

Thutlukna hi kum kalta December 19-a State Level Education Committee (SLEC) meeting-ah siam a ni a, kumin January 20 khan School Education Department hnenah hriattir niin, departmental officer-ten physical verification report an theh luh behchhana siam a ni.

Thuchhuahah chuan sorkar primary leh middle sikul 34 chu , zirlai naupang awm lohna leh zirna kalpui lohna a ni tih hmuhchhuah a ni a, academic session 2026–27 aṭanga khar tura hriattir an ni tih a tarlang. Sikul khar tura tihte hi Kiphire, Longleng, Mokokchung, Mon, Niuland, Phek, Meluri, Tuensang, Shamator, Wokha leh Zunheboto district amite an ni.

SLEC chuan verification report leh departmental officer-te bakah, stakeholder-te rawtna hmanga sorkar sikul 17 zawmkhawm a pawm bawk. He hmalakna hi academic year 2026-27 chhungin hman ṭan a ni ang.