Tripura : Hmasawnna project thawhna atan Rs vbc 950 invest

Union minister for development of North Eastern Region (DoNER) Jyotiraditya Scindia chuan nimin, January 25 khan sorkar laipuiin infrastructure, tourism leh healthcare tihhmasawnna turin Tripura tan Rs vbc 950 a invest tih a sawi.

Scindia chuan he thu hi Gomati district-a Dumboor Reservoir-a Mata Bari Tourist Circuit hawnnaah a sawi a, he hunah hian tourism minister Sushanta Chowdhury pawh a tel a ni.

Union minister chuan project Rs vbc 220 man hu thawh ṭan thuai a ni dawn tih sawiin, chung zingah chuan kawng siam, solar microgrid project leh health infrastructure pawh a tel. Rs vbc 152 senga sak Mother and Child Hospital leh, Rs vbc 200 senga sak Agartala Government Dental College pawh a tlawh bawk.Heng project-te hi June 2027 chhunga zawhfel tura ruahman a ni.

Scindia chuan Agar, North Tripura district-a Rs vbc 80 senna project hawn a nih tawh thu sawiin, Rs vbc 450 senna tur Mata Bari Tourism Circuit lungphum phum a ni tawh bawk tih a sawi. Tourism circuit hian hmun pawimawh panga -Tripurasundari Temple, Neer Mahal Palace, Sepahijala Wildlife Sanctuary, Chabimura leh Dumboor Reservoir-te a huam ang.

Hmasawnna tura prime minister Narendra Modi leh chief minister Manik Saha-te hmathlir bawhzuina chu a hlawhtin zel thu sawiin, Scindia chuan sorkar laipui leh state sorkar thawh hona ṭha chuan state hmasawnna kawngah nasa takin a pui tih a sawi bawk.