Zirna leh hmeichhe naupang chawikan Arunachal hmalam hun atan a pawimawh ber : Deputy CM

Arunachal Pradesh deputy chief minister, Chowna Mein chuan hmeichhe naupang zirna ṭha pek leh chawikan chu khawtlang hmasawnna leh hausakna atan a pawimawh thu a sawi.

Zirna chu hmasawnna lungphum pawimawh tak a nih thu sawiin, Mein chuan mi tinte theihna leh thiamna chawikan kawngah hmun pawimawh tak a chang a ni, a ti. State-a naupang zawng zawngte tan zirna ṭha, mi tin huapzo leh intluktlanna neih a ṭul tih a tarlang bawk. Tuna zirtirna ṭha pek chuan nakin hun zelah rah ṭha a chhuah dawn a ni, a ti.

National Girl Child Day puala thuchuah a siamah, Mein chuan state sorkarin hmeichhe naupang hamṭhatna leh thuam chakna nasa zawkin a pe dawn tih a tarlang. Hmeichhe naupangte chu a ṭha lama inthlak danglamna leh chakna thlentu an ni tih sawiin, an dikna chanvo humhalh chu khawtlang mawhphurhna a nih thu a sawi.

Deputy Chief Minister chuan state sorkarin zirna a ngaih pawimawh thu sawiin, hmeichhiate chawikan chuan nasa takin state hmasawnna a thlen tur thu a tarlang.