Assam : CM-in hmeichhia 18,000 chuang hnenah Rs 10,000 sem

Assam chief minister Himanta Biswa Sarma chuan Chief Minister’s Women Entrepreneurship Mission hnuaiah Duliajan Legislative Assembly biala hmeichhia 18,323 hnenah Rs 10,000 ṭheuh a sem. Cheque hi Duliajan-a mipui vantlang inkhawmah semin, a vaia sum an sem chhuah hi Rs vbc 18.37 a tling. He mission hnuaia hamṭhatna dawng zat chu assembly constituency 92-ah hmeichhia 22,46,551 an tling tawh niin official-te chuan an sawi.

Vantlang inkhawma thu a sawiah, Chief Minister chuan scheme chu hmeichhiaten inrintawkna an neih theihna tur leh, eizawnna mumal an neih theihna tur a nih thu a sawi. Hmeichhiate economy lama thuamchak chu state sorkarin a ngaipawimawh tih tarlangin; chhungkua, khawtlang, leh Assam economy tihchakna a ni, a ti bawk.

Official-te chuan he mission hi district hrang hrangah nasa taka chhawr ṭangkai a ni tih an sawi a, hamṭhatna dawngtute chuan ṭanpuina sum chu agriculture lama hmasawnna, sumdawnna tenau, self-help group enterprise, leh sum lakluhna kawnga hmalakna atan an hmang tih an tarlang. Duliajan-a hun hmanah hian hamṭhatna dawngtu, vantlang mipui aiawh leh official tel an ṭhahnem hle.

Hun hman zawha thuthar lakhawmtute a kawmnaah, CM Sarma chuan state sorkar chuan Assembly bial tinah sum lama ṭanpuina sem chhuah chu kumin February 5-ah zawhfel hman a tum tih a sawi.