Manipur : RPF/PLA cadre leh a unaupa man

Manipur police leh security force-te chuan Imphal West, Imphal East leh Senapati district-a beihpui an thlaknaah, dan pawna hnawl Revolutionary People’s Front/People’s Liberation Army (RPF/PLA) senior cadre Yumnam Brojen Singh (54) Kunjo tia hriat chu sum inlaksakna lian tham taka a inhnamhnawih avangin an man. Imphal West district-a Mayang Imphal police station hnuai Mayang Imphal Thana Awang Leikai-a cheng an man. A nau, Yuman Thoman Singh pawh an man bawk.

Chhuizuina an neihah Singh-a unaupa, Yumnam Thomas Singh (45), John tia hriat chu helpawl pawikhawihnaah a inhnamhnawih tih hriatchhuah a nih avangin thubuai siamsak a ni tih police official-te chuan an sawi. Security-te chuan an kut aṭangin mobile phone pahnih leh Aadhaar card pahnih an man bawk.

January 24 khan security force-te'n beihpui thlakna hran an neihah, Senapati Police Station hnuai Senapati Bazaar aṭangin Imphal East district-a Urup Salanpham Mathak-a cheng, sum inlaksaknaa inhnamhnawih Md Nawaj Khan (32) an man tawh bawk. Official-te chuan, Khan hian Imphal East-a mimal leh pawl hnenah vauna siamin, sum a laksak ṭhin niin an sawi.

An mi man kut aṭang hian mimal thil leh sum ṭhahnem tak hmuhchhuah a ni a, chung zingah chuan mobile phone pahnih, sana pakhat, identity document ṭhahnem tak, Aadhaar card, PAN card leh driving licence, credit card pakhat, leh debit card palite an tel. Chhuizuina neitute chuan an thil mante chu extortion network leh sum chevel chhuizuina atan a ṭangkai dawn tih an sawi.

Police official-te chuan helpawl leh sum inchhuksakna nena inzawm, funding channel leh an thawhpuite hriatchhuah tumin chhui chian belh zel a nih thu an sawi. Security force-te chuan dan loa pawikhawihna thleng ṭhin tihtawp a, state mipui humhim tura an beih zel tur thu an tarlang.