Manipur : CoTU-in K. Songlung khua haltute man turin darkar 24 hun pe

Manipur-a Kangpokpi district huamchhunga Sadar Hills-a Kuki-Zo community aiawh, Committee on Tribal Unity (CoTU) chuan K. Songlung (II) khaw haltute man ngei turin state sorkar leh sorkar laipui phutin, darkar 24 chhung hun an pe.

CoTU chuan thuchhuah siamin an thil phut tihhlawhtlin a nih loh chuan zanin zanlai thleng AH-2 leh NH-37 ah total shutdown puan a ni dawn tih an tarlang. Thuchhuah hi S. Kamson kaihhruai, Zeliangrong United Front (ZUF)-ten January 26-a Kangpokpi district-a Kuki-Zo community-te chenna in hal a nih chungchanga mawhphurhna an lak hnuah siam a ni. CoTU chuan K. Songlung (II) chu K. Geljang sub-division, PS New Keithelmanbi pawmpuina hnuaiah Kuki khua a ni tih tarlangin, ZUF-in opium chinnaah khaw mipui an inhnamhnawih nia an puhna an hnawl bawk.

Pawikhawihna thleng chu an dem tih sawiin, CoTU chuan sorkarin hma a la lo tih an tarlang bawk. Thuneitute chu pawikhawihtute man tur leh, pawisawi lo civil mi tibuaitu ZUF network tichhe turin an ngen. He pawikhawihna hi Kuki-Zo pawl; Sadar Hills Chiefs’ Association (SAHILCA), Kuki Autonomous People’s Development Council (KAPDC), Kuki Inpi South West, Sadar Hills Unit-II hnuaia awmte pawhin an dem tih an tarlang.