Arunachal: ULFA-I, NSCN (K-YA) nia rinhlelhten Assam Rifle camp bei

Arunachal Pradesh-a Changlang district-a Ranglum khuaa Assam Rifles Company Operating Base (COB), Myanmar ramri hnaiha awm chu Thawhṭanni zing dar 8:45 vel khan helpawl nia rinhlelhten an bei. Official-te chuan ULFA-Independent leh NSCN (K-YA) ṭangkawp chu he inbeihna thlenga mawhphurtu an nih an rin thu an sawi.

Assam Rifle-te chuan beih an tawhna chu chhang let ve nghalin, thi leh hliam an awm lo tih report a ni. He thil thleng vang hian ramri huam chhungah venhimna khauh zawka kalpui nghal a ni a, pawikhawihna thlentu helpawl man tumin security force-te chuan chhuizuina an nei nghal bawk.

Changlang super­intendent of police Kirli Padu chuan police team-te chu ramri huam chhungah thu kimchang bawhzui tura tirh an ni tih sawiin, Assam Rifle hnen aṭangin thu belhchian dawl leh kimchang zawk an la nghah thu a sawi. He khua hi India-Myanmar ramri hnaih, international border pillar number 168 bula awm a ni.

Arunachal Pradesh hian Myanmar nen ramri hung loh km 520 a thui an inṭawm a, hei hian ramri kaltlanga pawikhawihna leh helpawl chetvelna a ti hluar hle a ni. Security agency-te chuan thla eng emaw zat liam ta khan helpawl NSCN-K (YA)-te chuan Changlang district-a Hedman Camp an lo bei tawh bawk a ni.