Assam-ah HIV vei hmuhchhuah thar mi 928 awm

Assam State AIDS Control Society (ASACS) in a tarlan danin Assam-ah HIV vei mi 12,090 an awm a, kum 2015 chhung khan HIV vei mi 928 hmuh-chhuah thar an nih tih a sawi.

ASACS Project Director Manvendra Pratap Singh chuan, HIV vei hmuhchhuah thar a punna chhan chu thisen test an pun chak vang a ni, a ti. Assam chu HIV vei tamna state a nih loh thu sawiin, puitling zingah a vei chu 0.06% chauh a ni a, chu chu national avaerage 0.26% ai pawhin a hniam zawk a ni, a ti. Puitling bikah Manipur chu HIV vei tamna ber a ni a, 1.15% a tling phak a, India ramah a sang ber a ni. Mizoram (0.80%) leh Nagaland (0.78%)-te chu a sang zingah an lang bawk. Assam chu Manipur, Mizoram leh Nagaland-te'n an hual vel avangin HIV a pung chak niin Singh chuan a sawi bawk.

ASACS Project Director chuan Assam-a ṭhalai zingah state dangah hnathawka chhuak te zingah HIV vei theihna chance a san thu leh, a vei pawh an awm nual thu a sawi. West Bengal leh Nepal-a hnathawka chhuak hmeichhia te zingah vei an tam a. Intravenous Drug Users (IDU), Sex With Men (MSM), Female Sex Workers (FSW) leh Ante-natal Clinic (ANC) zingah HIV a hluar thu a sawi bawk.

Data aṭanga a landanin, HIV vei zingah mipat hmeichhiatna
aṭanga kai an tam ber a, 84.6% a tling phak a ni. Nuin a naupaia a kai chhawn (4.6%), anpui kawp (2.2%), thisen dawn aṭanga kai (1.1%), syringe inhman ṭawm
aṭanga kai (2.3%) leh chhan hriat loha vei eng emaw zat an awm bawk. District level data aṭanga a landan chuan, Kamrup (Metro) chu HIV vei tamna ber a ni a, Cachar, Dibrugarh leh Nagaon district-te'n an dawt a ni.