Khandu leh Rijiu-te'n festival hmanpui

Arunachal Pradesh Chief Minister Pema Khandu leh Minister of State for Home Affairs, Kiren Rijiju-te chuan Nilaini khan, Poi Pee Mau Tai-a Tai New Year festival an hmanpui.

He festival-ah hian Aruna-chal-a tribal ham hrang hrang leh Thailand aṭanga kal cultural troupe eng emaw zat an tel a ni. Chief Minister Khandu hian Hochayan-a Cultural Hall sak a hawng a, culture chu hnam hrang hrangte inpumkhat nana thil pawimawh tak a ni, a ti. Khandu chuan Tzu-ah civilian airport din tura hmalak a nih thu sawiin, Union Railway Minister chuan an state tlawh turin ruahmanna a siam tih a sawi. Namsai, Parashuram Kund leh Bhismaknagar-te chu khualzinte hip thei tura cheibawl a nih tur thu a sawi bawk.

Arunachal CM chuan Thai-land ram nena cultural exchange kalpui tura ruahmanna siam a nih thu sawiin, festival chhim tura Thai Embassy aṭanga palai lo kalte chu lawmthu a hrilh. State for Home Affairs minister Kiren Rijiju chuan Thailand chu ram hmasawn ber te zinga mi thu a sawi ve bawk a, an ram sorkar-in tourism leh sumdawnna a kalpui dante chu zir chian tham a ni, a ti. Union home ministry chuan khualzin ten awlsam zawka Arunachal an tlawh theihna turin khuahkhirhna dan ṭhenkhat chu siam ṭha turin hma a la tih a sawi. Sorkar laipui chuan Aruanchal tan 'special package' a duan thu leh, home ministry leh rural development ministry-te chuan proposal an buaipui mek thu a sawi bawk.

Tai New Year festival hi deputy chief minister Chowna Mein chuan a hmanpui bawk a, Poi-Pee-Mau-Tai Festival chu Calendar of Events-ah telh a nih tur thu a puang. Mein bakah hian Forest Parliamentary Secretary CT Mein, Tax & Excise Parliamentary Secretary Zingnu Namchoom, Tourism Secretary Dr Joram Beda leh sorkar mi pawimawh eng emaw zatin festival hi an chhim a ni.