UNC hruaitute chhuah turin phut

Naga Students’ Union Delhi-te'n an din Committee for Joint Naga Civil Societies Delhi (CJNCSD)-te chuan Manipur sorkarin a hren mek United Naga Council (UNC) hruaitute chhuah tura phutin Delhi-ah lungawilohna an lantir.

He hunah hian Delhi-a Naga pawl hrang hrangte an tel a, UNC president Gaidon Kamei leh infor-mation and publicity secretary S.K. Stephen-te chu chhuah turin an phut tih an sawi. CJNCSD hruaitu Lakpachui Siro chuan an thil phut a hlawh-tling mai lo a nih chuan New Delhi-ah demo-cratic movement kalpui an tum tih a sawi. Sorkar laipui chu Manipur sorkar leh Naga-te inkara buaina awm mek chingfel tura hma la tura an phut thu Siro chuan a sawi bawk.

CJNCSD-te chuan hemi chungchangah hian Thawhlehni khan minister of state for Home, Kiren Rijiju chu an lo hmu tawh a, hma lak pui turin an ngen. Memorandum pahnih thehlutin, an thil phut te chu tihhlawhtlin ngei an phut tih an hrilh. Delhi-a nawrh an huaihawt thlawp tur hian Naga Hoho president Chuba Ozukhum leh member dangte chuan New Delhi an pan dawn niin an sawi bawk. Manipur sorkar, Naga aiawh leh Ministry of Home Affairs-te chuan November 24 2016 khan, Sadar Hills leh Jiribam chungchangah Memorandum of Understanding (MoU) an ziak nia tarlan a ni.

CJNCSD-ah hian Naga Forum Delhi, Naga People Movement for Human Rights, Delhi Sector, Naga Lawyers’ Guild, Delhi, Naga Students’ Union Delhi, Forum for Understanding the Naga-India Conflict & Human Rights, Naga Scholars’ Association leh Naga People’s Union for Civil Liberties-te chu member an ni.