NH dan titawp turin military force tam zawk a ngai : Manipur sorkar

Manipur sorkar chuan United Naga Council (UNC)-te'n hun rei tak chhung National Highway an dan tihtawp a nih theih nan central paramilitary force tam zawk an mamawh tih a sawi.

Manipur High Court bench-a Chief Justice Rakesh Ranjan Prasad, Justice N. Koteswor leh Justice K. Nobin-te chuan state sorkar chu NH-a lirthei chet vel dan ruahman turin a hriattir a, hemi tihlawhling tur hian millitary force tam zawk an mamawh tih sorkar chuan a sawi. Manipur chakkhai lamna kawngpui pawimawh NH 2 leh 37-te hun rei tak chhung UNC-te'n an dan chah avang hian mipuiten harsatna an tawk nasa hle. Hei vang hian mipuite harsatna tawh mek sutkian a nih theih nan leh, kawngpui dan tihtawp a nih theih nan, Imphal-a cheng R.K. Joysana chuan court-ah petition a thehlut a ni. Court chuan state sorkar chu NH kawngpui dan tihtawp tura hma la tur leh, lirthei chet vel dan tur hi ruahman turin hriattirna a chhuah a ni.

Court chuan ni nga chhungin, Naga-te chenna paltlang NH 2-a lirthei chetvel dan ruahman tur hian state sorkar chu a hriattir a ni. NH 2-ah hian nawrh huaihawt ten truck pahnih an hal tawh a, kar kalta Ningani khan Khumbong-ah Taxi hal a ni leh bawk. Heng bakah hian tribal area-a lirthei bungraw phurte chu suasam a ni a, an bungraw phurhte an suasam ṭhin a ni. Hengte a nih avang hian venhimna khauh zawka kengkawh turin tih a ni.

Hemi chungchangah hian Manipur sorkar chuan thuchhuah siamin, NH dan titawp tur chuan central paramilitary force tam zawk an mamawh thu sawin, kawngpui kamah post 60 chuang hawn belh a ngai niin an tarlang. United Naga Council (UNC)-te hian November 1 aṭang khan state sorkarin Jiribam leh Sadar Hills-te district-a hlankai a tumna chu duh loin, kawngpui dan hi an kalpui ṭan a ni. Imphal-Dimapur (NH 2) leh Imphal-Jiribam (NH 37) highway-te dan a nih vang hian mipuiten harsatna nasa tak an tawk a, bungraw phur truck ṭhahnem tak Assam leh Manipur ramri-ah te an tangkhang mek.

Manipur buaina hian ziaawm lam a la pan thei meuh lo a, Wahengbam Leikai, Khumbong, Bishnupur, Kakching leh Khuyathong-ah te chuan lirthei tlan hmuh tur a awm meuh lo. Nawrh huaihawta pungkhawm te chu police-te'n tear gas hmanga hnawhdarh tumin an bei a, buaina liam tham erawh a chhuak lo nia hriat a ni. Jiribam leh Tamenglong-ah te chuan newspaper eng emaw zat hal a ni a, Khumbong-ah pawh lungawi lote chuan sumo an hal bawk.

Hetih lai hian United Naga council, Committee for Joint Naga Civil Societies-te chuan Manipur sorkarin a hren mek UNC hruaitute chhuah tura phutin Delhi-a Jantar Mantar-ah lungawilohna an lantir. Nawrh huaihawttute chuan United Naga Council (UNC) President Gaidon Kamei leh Information and Publicity Secretary S.K. Stephen-te chu thu delhkilh awm loa chhuah turin Manipur sorkar an phut tih an tarlang.

Manipur tualchhung buaina chungchangah hian November 29 khan, Minister of State for Home Kiren Rijiju, Ministry of Home Affairs (MHA) leh sorkar mi pawimawhte chuan meeting an lo nei tawh a ni.