APSC-in exam leh inter-view buatsaih leh thuai tum

Assam Public Service Commission Chairman (Incharge) Brig (retd) Ranjit Borthakur chuan exam ṭhenkhat leh inter-view postpone-te chu a hma lamah Commission chuan buatsaih a tum tih a sawi.

Borhakur chuan APSC-in harsatna hrang hrang a tawh avanga exam leh interview tihkhawtlai te chu a hma lama chhunzawm leh turin hma lak mek a ni, a ti. APSC-in harsatna a tawhte chu chinfel chhoh mek a nih thu sawiin, hun rei loteah an buaina chu chinfel an beisei tih a sawi. Hmalak kawngah state sorkar nen thawhdunna ṭha tak an nei tih sawiin, Chief Minister Sonowal nen pawh meeting an neih thu sawiin, hmalak dan tur an sawi dun tih a sawi. Sonowal-a hnen aṭangin thurawn tam tak a dawn thu sawiin, APSC chu pangngai taka a kal leh thuai a beisei a ni.

Assam sorkarin APSC hnuaia hna a lak ṭhenkhatah screening test leh oral test neih tur tih khawtlai a awm mek. Health deparment hnuaia hna lak turah mi 786 zet chuan interview an hmachhawn dawn a, APSC hmalaknain ni 15 hnu velah buatsaih theih beisei a nih thu tarlan a ni. Heng bakah hian commission chuan state sorkar hnuaia thawk tur zirtirtu lak hna a kalpui dawn bawk.

Hetih lai hian APSC office-a computer leh server-te chu police-te'n an control vek avangin admit card leh thil pawimawh dangte a pe chhuak thei rih lo. Chief Secretary chuan hemi chungchangah hian APSC hnenah sorkar server hmang turin thurawn a pe tawh nia sawi a ni. Borhakur chuan mipuite chu APSC hmalakna thlawp tura ngenin, a hnuaia hna lak ring ngam turin a chah. Tun dinhmunah APSC buaina tam zawk chu chinfel a ni tawh tih sawiin, harsatna chingfel turin hmalak mek reng a ni, a ti. APSC member eirukna laka fihlim lo te chu dim an nih loh tur thu sawiin, rinhlelh a awm a nih chuan chhuichian zel a ni ang, a ti.

APSC Chairman Rakesh Kumar Paul leh member dang Samedur Rahman leh Basanta Kumar Doley bakah, Assistant Controller of Examinations Pabitra Kaibarta-te chu APSC hnuaia hna lakah thamna sum laa puh an nih avangin piolice-te'n an kawl mek. Anni bakah hian official dang tunhnai khan man an ni leh nia tarlan a ni bawk.

Assam Public Service Commission Chairman (Incharge) atana ruat thar Brig (retd) Ranjit Borthakur hi APSC member a ni a, APSC chairman Rakesh Paul chu November 4 khan thamna sum laah puh a nih avangin man a ni a, acting chairman atan kar kalta Ningani khan ruat a ni.