Tripura Bar Council-in lawyer 250 chuang hremna pe

Tripura Bar Council (TBC) chuan, an state chhunga lawyer 250 chuang zet chu, kum nga chhunga court thilah inhnamhnawihna an neih loh avangin hremna pek an nih thu Ningani khan a tarlang.

TBC president Pijush Kanti Biswas chuan, heng lawyer-te hi kum nga chhung atan hremna pek an ni, a ti. Biswas chuan TBC hnuaia inziaklut advocate 1,100 an awm tih sawiin, heng zinga 250 chuangte chu tun hnai kum nga chuang chu court thil tihah inhnamhnamhnawihna an neih loh avangin member an nihna hlihsak lailawk an ni, a ti. Biswas chuan hmalakna hi Bar Council of India thupek anga kalpui a nih thu a sawi. TBC president chuan law-a degree nei, advocate nia inchhal politics leh thil buaipui eng emaw zat an awm thu a sawi bawk.

Lawyer hremna pek zingah hian mi challang tak tak - Tripura Chief Minister hlui Samir Ranjan Barman te, Tripura assembly Speaker hlui Ramendra Chandra Debnath, Bharatiya Janata Party state unit Vice President Subal Bhaumik, Trinamool Congress leader leh MLA Sudip Roy Barman-te pawh an tel a ni. Lawyer hremna pekte hi Bar Council of India-in guideline a siam an zawm a, court thila a intatlut leh a nih chuan TBC member an ni leh thei dawn tih Biswas chuan a sawi.