Darkar 72 chhunga Nawrh titawp turin UNC hriattir

United Committee Manipur (UCM) chuan United Naga Council (UNC)-te chu, Pathianni zanlai aṭanga chhiara darkar 72 chhunga nawrh tawpsan turin a hriattir.

UCM President John-son Elangbam chuan, "UNC-te'n National Highway kawngpui an dan mek chu darkar 72 chhunga titawp turin kan ngen a ni, hun tiam chhunga kan ngenna an tihlawhtling lo a nih chuan Manipur mipuiten hma kan la tawh dawn a ni" a ti. UCM chu Manipur-a hnam hrang hrangte inkara inunauna a awm theih nana hma la tu an nih thu sawiin, remna leh muanna a awm chu an duh ber a nih tih a sawi. June 18, 2001 khan sorkar laipui leh National Socialist Council of Nagaland (I-M)-te chuan inremna an ziak a, he inremna duhlohna lantir hian mipui ṭhahnem tak kawtlaiah an pungkhawm a ni. Mipui pungkhawm hnawh darh nan security forces-te chuan silai an hmetpuak a, mi 18 an thi. He thil thleng hi UCM-te chuan nasa takin an dodal a, Manipur hmun hrang hranga chengte inkarah inpumkhatna a awm theih nan hma an la ṭan ta a ni.

UNC hian police-te'n an kawl mek an President Gaidon Kamei leh Publicity Secretary Stephen Lamkang-te chhuah tura phutin nasa zawkin nawrh an huaihawt leh a ni. UNC-te hian November 1 aṭang khan NH 2 leh 37 an dang ṭan a, Chief Minister Okram Ibobi Singh-a kaihhruai sorkar chu Sadar Hills leh Jiribam-te district-ah hlangkai lo turin an nawr.

CM Okram Ibobi Singh chuan UNC-te nawrh huaihawt chuan state chhunga construction work hna thawh nasa takin a nghawng tih Pathianni khan a sawi. Singh chuan sorkar laipui chu National Socialist Council of Nagaland - Isak-Muivah (NSCN-IM)-te inbiakna neihpui tur leh, hun rei tak chhung NH kawngpui dan tihtawp a nih theih nana hma lak pui turin a ngen tih a sawi nawn leh a ni. Manipur CM chuan, chakkhai lamna kawngpui pawimawhte dan hian nasa takin hmasawnna hnathawh a tikhaihlak a, Myanmar leh Manipur inrina International Boreder kianga Integrated Check Post sak mek pawh a nghawng a ni, a ti. Bungraw phur truck tam zawngin Imphal an thlen theih loh avangin insakna bungrua a to em em a, cement bag khat Rs 420 ni ṭhin chu Rs 850-ah a kai chho tawh a ni, a ti bawk.

Manipur Chief Minister Okram Ibobi Singh chuan mipui-te chu hmasawnna hna thawh tiṭhuanawp zawnga hmalak-na thlawp lo turin a ngen.