BJP-in ram dang mi nia rinhlelhte lakah complaint nuai 5 chuang thehlut : Assam CM

Assam chief minister Himanta Biswa Sarma chuan, rorellai Bharatiya Janata Party (BJP) worker-ten state-a electoral roll special revision neih a nih chhungin ram dang mi nia rinhlelhte lakah complaint nuai nga chuang an theh lut tih a sawi. Sivasagar district-a Demow-a thuthar lakhawmtute a kawmnaah, Sarma chuan he hmalakna neih chhunga complaint theh luh chu ram pum huapa mawhphurna a nih thu a sawi bawk.

CM Sarma chuan Bangladesh aṭangin document mumal nei lo, Muslim leh Bengali hnam , Miya tia sawite chu state-ah dan loin an pem lut a, he thil vang hian party worker-te chuan complaint nuai nga chuang an siam tih sawiin, he hmalakna hi kalpui a nih loh chuan state-a ram dang mi pemlutte chuan zalen takin vote an thlak thei dawn tih a tarlang.

Election Commission-in electoral roll special intensive revision a kalpui mekna state leh Union Territory 12 zingah Assam hi a tel lo a, poll panel chuan a hranin state-ah hian voter list special revision a kalpui thung a ni. Chenna in tina electoral roll endikna chu kum kalta November 22 leh December 20 inkar khan neih a ni. He hmalaknaah hian special intensive revision ang lo deuhin document endikna neih a ni lo thung.

State-a special revision neih hmangin voter nuai 10 chuang paih a ni dawn tih Election Commission chuan kum kalta December 27 khan an lo sawi tawh a ni. Final electoral roll hi kumin February 10-a tihchhuah hman tum a ni.