Bengaluru-ah Assam mi pali thiin hmu

Assam aṭanga private company-a hnathawk mi pali chu Inrinni, January 31, 2026 khan Bengaluru khaw pawn lam, Hoskote taluk-a Muthsandra khuaa labor shed chhungah thia hmuh an ni. Mitthi ruang an hmuhte hi Jayant Sindhe, 25, Neerendranath, 24, Doctor Tide, 25 lehDhananjay Tide, 20 te an ni a, an pali hian soft drink warehouse-ah security guard hna thawk lai an ni.

Police-te chuan he thil thlen lai hian hnathawk palite hi shed chhungah an muhil nia sawiin, chhuizuina an neihah an thih chhan hi an awmna hmunah boruak a awm ṭhat tawk loh vanga thawhaha thi niin sawi mah se, a chhan dik tak erawh hriat chian a la ni lo.

Police-te chuan hnathawkte hian January 30, Zirtawpni zan khan an shed chhungah ei leh in siamin, kawngka leh tukverh an khar phui vek niin an sawi. Shed chhungah boruak luhna tur a awm mumal loh avangin an nunnain a tuar phah niin an sawi bawk. He thil thleng hi January 31 zinga an duty tur an in report loh hnuah hriat chhuah a ni. An thudawn bawhzuiin Sulibele police-te chu a hmunah hian kal nghalin, an thlen chuan an pali hian an lo thi tawh a ni.

Mi palite ruang hi sorkar hospital-ah post-mortem tura lak niin, post-mortem result leh forensic report an dawn hunah an thih chhan hriat a ni thei ang. Police-te chuan an hnathawhpui, warehouse management staff leh contractor-te statement an record bawk. Sulibele police-te chuan Unnatural Death Report (UDR) theh lutin, hnathawkte awmna tur hmun him lo tawk lo chungchangah a chhawrtu emaw contractor emaw lam aṭanga inngaihsak tawk lohna a awm em tih chhui chian mek a ni. Tualchhung mite chuan contract-a hnathawkte chenna hmun a him tawk lo tih sawiin, labour shed tam tak chuan ventilation mumal leh kangmei laka invenhimna an nei lo tih an sawi bawk.