Karmapa-a'n AP a tlawh vangin China lawm lo

Tibetan sakhaw puithiam Karmapa chuan tun hnai khan Arunachal Pradesh a tlawh a, hei hi China chuan a dem thu Thawhṭanni khan a sawi.

Chinese Foreign Ministry thupuangtu Lu Kang chuan, India-in Tibetan sakhaw puithiam Karmapa-a'n Arunachal tlawh a phalsak chu China chuan a dem tih sawiin, ramri chungchangah buaina a hring chhuak ang tih a hlauhawm niin a sawi. China-India border chungchanga buaina siam zawnga chet an duh loh thu sawiin, India chu ramri buaina chawk chhuak thei zawnga che lo tura an duh thu a sawi bawk.

China hian Tibetan sakhaw puithiam Dalai Lama-a'n Aruna-chal a tlawh tur chungchang-ah India a lo khak tawh bawk a, ram pahnih inkar tichhe thei thil niin a sawi. Dalai Lama hian nakkum kumtir lam khian Arunanchal a tlawh dawn a, sorkar laipui chuan phalna a pe tawh. Hei hi Chian chuan a helh hle a, na takin India a lo sawisel tawh a ni. Kumin October thla khan US envoy Richard Verma chuan Arunachal Pradesh a tlawh a, India leh China inrinna Line of Actual Control (LAC) a fang. Hei pawh hi China chuan a lo khak tawh bawk.

Karmapa hian kar kalta khan Arunachal Pradesh a tlawh a, Tenzingang-a Gyuto Monastery a tlawh a ni. Union Minister of State for Home Affairs Kiren Rijiju chuan Karmapa-a'n Arunachal a tlawh chu lawmawm a tih thu a sawi.