Manipur: UNC-te'n Economic Blockade chhunzawm zel dawn

United Naga Council, (UNC)-te chuan National Highway dan titawp tura ngenna an hnawl thu leh, an thil phut a hlawhltin hma loh chuan an chhunzawm zel dawn tih an tarlang.

UNC thuchhuah chuan, NH, Trans Asian Railways leh National Project hna thawh mek chu an dan chhunzawm zel tur thu an tarlang. Union Ministry of Home Affairs leh UNC-te'n inremna an ziah tawh Manipur sorkarin a pawm loh avanga nawrh chu tawpsan an tum loh thu an sawi a ni. Naga mipuite chuan Sadar Hills leh Jiribam Sub-Division-te district-a hlankai an rem ti lo tih sawiin, state sorkar leh Naga-te'n Memorandum of Understanding (MoUs) an ziah tawh bawhchhiatna a ni, an ti.

Naga-te'n an ram humhim nana an hmalakna titawp tura sorkarin security forces a hmang chu dankalh a nih thu leh CrPC section 144 a bawhchhiat thu UNC thuchhuah chuan a tarlang. Buaina a zual zel chhan chu sorkar a ngawih reng vang a nih thu leh, remna a awm theih nana inbiakna neihah eng vanga palai tir lo nge a nih tih sorkar an zawt. Sadar Hills leh Jiribam-te chungchanga sorkar a ngawi reng chu an hrethiam lo tak zet tih sawiin, sorkar chu buaina chinfel tum lohah an puh bawk.

UNC-te nawrh huaihawt avang hian truck leh oil tanker 400 chuang zet chu Jiribam-ah an tangkhang mek a, hengte hi Imphal thlenpui an nih theih nan venghimtu tirh an ni. NH-2 leh NH-37-a tang mek truck ṭhanhnem tak chu venhimna hnuaiah Imphal pan pui turin sorkar chuan ruahmanna a a kalpui mek a ni.