Guwahati-ah curfew puang

Assam-a Citizenship (Amendment) Bill (CAB) duh lohna lantirnaa buaina chhuak chuan ziaawm lam a pan thei lo a, hei vang hian nizan dar 7 aṭang khan Guwahati khawpuiah curfew puan a ni a, state chhunga district 10-ah mobile internet service tihtawp a ni bawk. 

All Assam Students' Union (AASU) chuan CAB duh lohna lantirin nasa zawka nawrh chhun­zawm zel an tum thu an sawi. Nawrh huaihawtte leh police-te nasa takin an innawr buai a, nawrh huaihawt zinga mi tam tak chu Guwahati, Dibrugarh leh Jorhat-ahte man an ni. 

Guwahati-ah chuan nawrh huaihawtte hian secretariat complex bul kawngpui an dang a, GS road-a police-ten daidanna an siamte pawh an tichhe bawk. Hei vang hian police-te nen an innawr buai zui ta a ni. 

Pathiannia prime minister Narendra Modi leh Japan prime minister Shinzo Abe-ten summit an neihna tur kawnga stage siam an tichhia a, sorkar scheme fakmawina hoarding leh banner intarte pawh la thlain secretariat kawtah an hal bawk. 

Dibrugarh-ah pawh CAB dodaltute leh police-te innawr buaiin, police-te chuan pungkhawmte hnawhdarh nan rubber bullet leh tear gas-te an hmang. An innawr buainaah hian journalist pakhatin hliam a tuar a ni. Jorhat, Golaghat, Tinsukia, Sivasagar, Bongaigaon, Nagaon, Sonitpur leh district dangah pawh nimin zing aṭang khan nawrh huai­hawt leh a ni a, chief minister Sar­ba­nanda Sonowal-a khua Chabua-ah pawh CAB duh lohna lantirin motorcycle rally an nei bawk.

Assam Secretariat hnathawkte chuan nimin khan an office aṭanga chhuakin Guwahati Dispur-a CAB duh lohna lantirte an zawm ve. Secretariat hnathawkte hian an offical hnate kalsanin kawngpui lam hi an pan a, Dispur Secretariat kawta CAB duh lohna lantirtute chu zawm vein, duh lohna hi an lantir chhunzawm ve nghal a ni.

Nawrh huaihawt avang hian nimin khan Guwahati Airport-ah mi tam tak an tangkhang a, an zingah hian Assam chief minister Sarbananda Sonowal pawh a  tel. Mahse hun eng emaw chen hnuah security force-te chuan airport 

aṭangin CM hi hruai chhuakin, a chenna in an panpui a ni.