Assam sorkarin Class IX leh X tan Textbook a thlawnin sem dawn

Assam sorkar chuan zirlai tam zawkin zirna an chhunzawm theihna turin academic session thar aṭangin Class IX leh X tan zirlaibu a thlawnin a sem dawn.

Sorkar thuchhuah chuan textbook a thlawna sem tur hi December 25-ah zirlaite pek chhuah hman tum a nih thu sawiin, session thar chu nakkum January aṭanga ṭan a nih tur thu a tarlang. Zirlaibu a thlawna sem tur hian sorkar school, sorkar sum hmanga din high school leh higher secondary school-te a huam ang. Heng bakah hian tea garden school, local body school, Rashtriya Madhyamik Siksha Abhijan (RMSA) hnuaia school leh non-provincialised school-te a huam dawn a ni. Assam State Textbook Production and Publication Corporation Limited chu agency atan thlan an ni a, an ni hian a print leh a semchhuahah bul an tum dawn a ni.

Director of Secondary Edu-cation chu state nodal officer a ni ang a, school inspector-te chu an district ṭheuhah district nodal officer an ni ang. He scheme hnuaiah hian Education department Principal Secretary kaihhruaina hnuaiah state-level committee din a ni a, Secondary Education Department Secretary chu Member Secretary a ni ang. Textbook sem chhuah hi district-level committee chuan an vil ang a, deputy commi-ssioner chu chairman niin, deputy commissioner hian school principal pahnihte chu member atan a ruat dawn a ni.

Assam sorkar chuan Class IX leh X tana zirlaibu a thlawna sem chu zirlai zinga zirna chawlhsan tihtlemna tur leh, mirethei zawk ten zirna sang zawk an zawm theih nana ruahmanna a nih thu a tarlang.