APSC memberte nena inzawmna neia hriat chenna-in dap ve leh

Assam Police-te chuan model leh film star ni bawk, Nibir Swapnam chu Assam Public Service Commission (APSC) member-te nen inzawmna an nei nia sawiin, a chenna-in an dap ve leh.

Police-te chuan APSC member an kawl mek Samedur Rahman leh a PSO Mamud Ali Choudhury leh Nibir Swapnam-te hian inzawmna an neih thu an sawi. Nibir Swapnam chenna-in hi darkar hnih chhung dap a ni a, police-te chuan document pawimawh bakah mobile phone-a an inbiakna zawng zawng an record vek thu an sawi. Police-te hian kar kalta Inrinni khan APSC member Basanta Doley chenna-in chu an lo dap tawh bawk a, candidate-te admit card 20 an hmuchhuak a ni.

Director General of Assam Police Mukesh Sahay chuan Nibir state-ment eng emaw zat an lak thu sawiin, APSC member-te nen inzawmna an nei ngei niin a sawi. Hetih lai hian Nibir Swapnam chuan inhnamhnawihna engmah a neih loh thu a sawi ve thung a ni. APSC hnuaia hnalaknaa thamna sum leng vel kaih-hnawihah hian APSC chairman Rakesh Paul chu a mawhphurtu berha ngaih niin, man a nih hnuah state sorkar chuan a suspend a, a aiawh tur a ruat nghal bawk. Mem-ber dang eng emaw zat man an ni tawh bawk a, thuzawh fiah mek an ni.