Union budget-in awmze nei takin hamṭhatna thlen dawn : Assam CM

Assam chief minister Himanta Biswa Sarma chuan nimin February 2 khan, state leh hmarchhak bialah reform-oriented union budget 2026-27 hmangin awmze nei takin hamṭhatna leh hmasawnna a awm dawn tih a sawi. Union budget tharah hian hmarchhak bial tihhmasawnna turin Rs vbc 6,812 ruahman a ni.

Sarma chuan fiscal transfer tihpun, infrastructure, healthcare tihchangtlun, tourism thuam chak leh hnathawh tur siam kawnga hmalaknate chu thil pawimawh tak a nih thu sawiin, 16th Finance Commission rawtna pawm chuan an chhiah chan tur a tipung dawn tih sawiin, Assam chuan chhiah aṭanga a chanvo tur chu 3.128% aṭangin 3.258%-ah a pun beisei niin, hmasawnna tur tam zawk a siam dawn a ni, tih CM chuan a tarlang.

Sector hrang hrangah hmalam hun tur ngaih pawimawh a ni chu lawmawm a tih thu sawiin, Sarma chuan budget thar hian semiconductor, electronic siamna, data centre, chemical park leh rare earth-ah ṭhalaite tan hnathawh tur a siam dawn a ni, a ti. Ram chhung hmun hrang hranga Self-Help Mart (SHE-Mast) dinna tura rawtna awm pawh sawi langin, he hmalakna hian Assam-a Mukhyamantrir Mahila Udyamita Abhiyan (MMUA) hnuaia Lakhpati Didis-a ecosystem ngelnghet siam tura hmalakna a tichak lehzual dawn tih a sawi.

Fishery, commercial farming leh Amrit Sarovars-te puihbawmna pek ngaihpawimawh chuan loneitute leh an thawhpuite tan hamṭhatna nasa tak a thlen dawn tih CM chuan a sawi. Tourism leh khawpui hmasawnna tur tarlangin, hmarchhak bialah tourism circuit thar din a ni dawn a, Tier II leh III khuaah infrastructure leh mipui veivahna (public transport) atan investment siamin, hei hian Assam-a inthlunzawmna a tichak dawn tih a sawi bawk.

Sarma chuan cultural, creative leh digital content industry-te tana policy leh institutional thlawpna pek chuan helai biala mi thiamte leh content creator-te tan kawng thar a hawng dawn tih tarlangin, Tezpur-a National Health Institute pawh tihchangtlun a ni dawn tih a sawi.