Nagaland : Dzükou valley-ah ni 8 chhung ram kang tawh

Nagaland khawpui, Kohima district-a Dzükou valley-a ram ngaw kang chu nimin kha a ni riatna a ni tawh. Ram kang ṭhelh hna rim taka thawh a nih avangin hmun tam zawka kangmei chhuak chu thunun a ni tawh a ni.

Kohima deputy commissioner B Henok Buchem chuan kangmei hi kumin January 26-a chhuak a nih thu sawiin, Mount Tempfü leh a chhehvelah kangmei hi a chhuak nasa hle a, hmun dangah erawh chhiatna thlen khawpin a chhuak lo tih a sawi. Mount Tempfü leh Mount Merata bulhnaiah kangmei hi chhuak ṭha lehin, helipad huam chhungah erawh thunun a ni tawh thung.

Agency hrang hrang aṭangin mi 150 chuang ram kang ṭhelh tur hian an che chhuak a, hmun ṭhenkhat chu a hmunin a zir loh vangin thlen harsa tak tak a nih avangin ṭhelh a harsat thu a sawi bawk. IAF helicopter pahnih, Bambi bucket pathum ṭheuh phur hmangin Inrinni leh Pathianni khan kangmei ṭhelh hna thawh a ni tih official-te chuan an sawi bawk.

District official pakhat chuan kangmeiin ramngaw a tihchhiat hi zirchian a ni dawn tih sawiin, ramngaw hmun thum a ṭhena hmun khat chu a kan chhiat a rin thu a tarlang. Thuneitute chuan kangmeiin a tih chhiat nasat zualpui chu mau chinna a ni tih an sawi.