Union Budget chu state-in a ngaih pawimawh nen a inmil : Meghalaya CM

Meghalaya chief minister Conrad K Sangma chuan Union Budget 2026-27 chu state-in hmasawnna leh hun rei tak chhung daih tur ṭhanlenna tur a ruahman nen a inmil tih a sawi. Budget chuan ecomony ṭhanlenna ngelnghet leh, sorkar laipuiin hmasawnna zau zawka kalpui kawnga a inpekna a tilang a ni, a ti.

Sangma chuan hmarchhak bial hmasawnna tur ngaihpawimawh a nih chhunzawm zel avangin, state pawhin infrastructure thuam chak leh economy ṭhanlenna kawngah a chhawr ṭangkai dawn hle tih a sawi. Union Budget-ah hian public capital expenditure chu Rs vbc nuai 12.2-ah tihsan a ni a, Special Assistance to States for Capital Investment (SASCI) hnuaiah Rs vbc nuai 1.85 dah a ni bawk.

Sum hman tur tihpun a nih tak avangin, infrastructure hmasawnna, inthlunzawmna leh inkalpawhna, hmun chhengchhia leh tlawh pawh harsaa chengte tana service pek a tiawlsam tawh dawn a ni. Budget tharah hian state tan hamṭhatna tur tam tak awmin, chung zingah chuan kutkawih eizawnna (entrepreneurship), tourism, zirna, thiamna tihhmasawn, healthcare, lo neih leh thingtlanga khawsak tihchangtlungte an tel. MSME leh hmeichhe enkawl enterprise-te sumdawnna a tichak dawn a, zirnaa investment tihpun leh ṭhalaite thiamna pek chuan hnathawh tur a ti tam thei dawn bawk.