Budget tharin startup a thuam chak dawn : Manipur Ex-CM

Manipur chief minister hlui N Biren Singh chuan Union Budget 2026-27 chuan hmarchhak biala startup, IT-enabled service leh ṭhalai thiamna neite tan hun remchang thar a siamsak dawn tih a sawi. A social media X-ah thuchhuah siamin, Singh chuan prime minister Narendra Modi leh union finance minister Nirmala Sitharaman-te kaihhruaina hnuaiah India ram chu IT sector-ah nasa takin a ṭhang dawn tih a sawi bawk.

Singh chuan budget thara lo neih lam thuam chak ngaih pawimawh a ni chu loneituten an chhawr ṭangkai dawn tih sawiin, an sum lak luh a tihpun dawn bakah thingtlang khawsak a tichangtlung dawn a ni, a ti.

Hetih mek lai hian Manipur Pradesh Congress Committee president Keisham Meghachandra chuan budget thar chu sawiselin, state-a buaina thleng mek ngaihthah a nih thu a sawi. Kum thum chhung Manipur-ah hnam leh hnam inkarah buaina a chhuak tawh a, mi sang telin chenna tur mumal an neih loh lai leh, chhungkaw tam tak an chenna in leh loa kir tumten harsatna nasa tak an tawh pawh ngaihthah an ni tih X-ah a tarlang ve bawk.

Meghachandra chuan budget-ah hian state-in remna leh muanna a neih theih dan tur telh a ni lo tih tarlangin, infrastructure thuam chak ni mah se, state boruak a ralmuang lo tih a sawi. Kawng siamṭhatna tur atana Rs vbc 12,000 ruahman pawh mipui an zin veivah ngam loh avangin awmzia a nei lo a, state chuan remna leh muanna a mamawh ber a ni, a ti.