Manipur : Sorkar thar din a ni dawn

Manipur-a Chief Minister thlan leh sorkar thar din tura hmalakna hmasa berah, Bharatiya Janata Party (BJP) chuan Thawhṭanni khan state-a legislature party hruaitu thlanna lo awm tur atan party national general secretary, Tarun Chugh chu central observer atan a ruat.

Manipur hi kum kalta February thla aṭang khan Kuki leh Meitei inkara buaina chhuakin a nghawnga chief minister hlui N Biren Singh a ban hnuah Presidents' rule hnuaiah a awm tawh a ni. Presidents' rule hi kum khat an hmanna a nih tak avangin BJP kaihhruai National Democratic Alliance (NDA) MLA eng emaw zat chu party hruaituten koin, nimin khan Delhi an thleng a ni.

Manipur Assembly-ah hian member 60 awmin, tun dinhmunah BJP hian MLA 37 a nei a, Janata Dal United (JDU)-in MLA pakhat an nei bawk. National People's Party (NPP) aṭangin MLA paruk, Naga People's Front aṭangin panga, Congress aṭangin panga, Kuki People's Alliance (KPA) aṭangin pahnih leh independent MLA pathum an awm.

BJP hian kum 2027-a assembly inthlan neih turah state chief minister thar an thlan rin a ni. Sorkar thar kaihruai thei tur langsar zingah Manipur Assembly speaker ni lai Thokchom Satyabrata Singh chu sawirik a ni. Thokchom hi kum 2020-22 khan Yaiskul bial MLA a lo ni tawh a ni.