Assam CM-in hmarchhak tana thawk turin police-te chah

Assam Chief minister Sarbananda Sonowal chuan police-te chu hmarchhak a him zawk theih nan leh, eirukna nuaibo a, hel leh ram dang mite laka a him zawk theihna tura hma la turin a ngen.

CM Sonowal hian Nilaini khan Shillong bul, North Eastern Police Academy-a passing out parade a hmanpuinaah he thu hi a sawi a ni. Sonowal chuan, “Hmarchhak chu eirukna laka fihlim, hel leh ramdang mite awm lohna ni tura kan beih chuan kan thei dawn a ni. Chumi tur chuan police-te'n nasa taka inbeih a ngai a, in hnung kan zui dawn a ni" a ti. Hmarchhak harsatna tawh lian tak chu hel an ni a, an ni hi ralthuam nena che ṭhin an ni a, nuaibo turin nasa taka beih a ngai a ni, a ti. Mipuite himna chu a pawimawh ber tih sawiin, chumi tur chuan theihtawp chhuaha hmarchhak mipuite ṭanrual a ngaih thu a sawi.

Passing out parade-ah hian training zo mi 98 an tel a, kar 48 chhung an training a ni. An zingah hian Assam aṭangin mi 58, Arunachal Pradesh (15), Tripura (9), Nagaland (7), Mizoram (5), Manipur (2) leh Sikkim leh Meghalaya aṭangin mi pakhat ve ve an tel a ni.