Arunachal Christian Forum-te'n Dec 25-a Governance Day hman duh lo

Sorkar laipuiin Good Governance Day atana December 25 a ruat chu Arunachal Christian Forum (ACF)-te chuan an pawm lo tih Thawhlehni khan an sawi.

ACF-te chuan Atal Bihari Vajpayee piancham denchhena December 25, Good Governance Day atana ruat chu an pawm lo tih sawiin state sorkar chu sorkar laipui thutlukna siam tawh sut leh tura hma la turin an phut tih an sawi. December 25 chu Christian-te ni pawimawh ber Christmas a nih avangin pawm theih a ni lo, an ti. ACF President Khoda Apik chuan,“Sorkar laipui thutlukna siam chu Christian-te tan chuan a lungchhiat thlak hle a ni, India rama sakhaw hrang hrangte zalenna palzutnaah kan ngai" a ti. Thutlukna hi kaltlangpui a nih chuan sorkar hnathawkte chuan Christmas an hmang thei dawn lo tihna a ni a, a pawi hle a ni, Apik chuan a ti.

Good Governance Day atana December 25 ruat hian India danpui, Article 25 a kalh niin ACF-te chuan an sawi a, Fundamental Rights palzutna a ni tih sawiin ni dang ruat zawka tura an phut thu an sawi. ACF General Secretary Toko Teki chuan state chief minister Pema Khandu pawhin sorkar laipui thutlukna siam hi a pawmpui lo niin a sawi a, Good Governance Day chu state chhungah a ni sawn a nih loh chuan boycott an tum tih a sawi.