Thamna sum lak thubuaiah Mi tam zawk man belh mai thei: ADGP

Assam Director General of Police (DGP) Mukesh Sahay chuan, Assam Public Service Commission buaina kal zelah mi tam zawk man belh an nih a rin thu Ningani khan a sawi.

DGP Mukesh Sahay chuan, APSC hnuaia hna laknaa thamna sum lak thubuai chhuina kal zelah mi eng emaw zat man an nih tawh tih sawiin, he thila inhnamhnawih mi ṭhenkhat man belh leh an ni mai thei niin a sawi. Sahay chuan, hnu chhui chu ngawrh taka kalpui a nih thu leh, thla hnih chhungin charge sheet peihfel hman beisei a ni tih a sawi. DGP hian Nilaini khan Guwahati-ah press conference a ko a, police-te chuan mi pathum enthlak mek an nei niin a sawi. APSC hnuaia hna laka candidate mi pali te chu chhui zui mek an ni tiin, answer script leh tabulation sheet eng emaw zat chu Rakesh Kumar Paul-a unaupa private press aṭanga an hmuhchhuah tawh thu a sawi bawk.

State sorkar chuan APSC hnuaia hna lakah thamna sum tam tak a leng tih hriain, police-te a chhui tir nghal an ni. Police-te chuan APSC Chairman Rakesh Paul chu November 4 khan an man a, member dang Samedur Rahman leh Basanta Kumar Doley-te pawh man an ni tawh. Anni bakah hian APSC-a Assistant Controller of Exami-nations Pabitra Kaibarta chu man a lo ni tawh a, he thila inhnam-hnawih nia hriat mi eng emaw zat chenna-in dap sak an ni tawh bawk. Thamna sum lak chungchangah hian politician leh mi challang eng emaw zat hming a lang nia sawi a ni.