UNC hruaitute ni 15 chhung judicial custody-ah dah dawn

Court chuan United Naga Council (UNC) hruaitu pahnih police-te'n an hren mek, President Gaidon Kamei leh Information and Publicity Secretary SK Stephen-te chu ni 15 chhung judicial custody-a awm turin Ningani khan thupek a chhuah.

UNC hruaitu pahnihte hi November 25 khan man an ni a, UNC-in hun rei tak chhung National Highway an dan chungchangah mawhphurtuah puh an ni. Imphal East Chief Judicial Magistrate, Aribam Noutuneshwari Devi chuan Gaidon Kamei leh SK Stephen-te bail dilna chu hnawl a nih thu leh, ni 15 dang police-te kutah la awm leh tura thupek tih chhuah a ni, a ti. UNC hruaitute hian an hriselna chhuanlamin bail an dil a, hei hi court chuan a hnawl sak ta a ni. Judge Noutuneshwari chuan UNC president leh Information Secretary-te chu judicial custody-ah December 22 thleng awm tura thupek chhuah a nih thu hi a sawi ve bawk.

Mao police-te chuan Kamei leh Stephen-te lakah hian truck hal chungchangah thubuai an ziaklut. UNC supporter ṭhenkhat chuan November 21 khan Senapati district-a ST Joseph School bul National Highway-ah truck an hal a, he thil thlengah hian UNC hrtuaitu pahnihte hi mawhphurtuah puh an ni bawk. Manipur CM Okram Ibobi Singh chuan UNC hrauitute chungthu dan hmanga chinfel a nih tur thu a lo sawi ve tawh bawk.UNC president Kamei chuan media-te zawhna chhangin, NH dan chu Naga mipuite duhthlanna a nih thu leh, Sadar Hills leh Jeribam-te chu districta hlankai an duh lo tak zet tih a sawi.

Hetih lai hian Chandel Naga civil societies coordination core committee-te chuan, United Naga Council (UNC) president Gaidon Kamei leh information and Publicity secretary SK Stephen-te chhuah phutin, Chandel district headquarter-ah Nilaini khan kawngzawh an huaihawt. UNC Asst General Secretary Gabriel Chinir chuan Manipur sorkar chuan Naga pawl hrang hrangte rem tihna lo chuan Jiribam leh Sadar Hills-te chu district-ah a hlankai an remti lo tih a sawi. A ni bakah hian Naga pawl hrang hrang hruaitu CNPO President Ws Kanral, CNCSCCC Convener Wng Kohring Victor, NSUC President Sr Joningam, NWUC President Lh Bliss-te chuan thu an sawi. Kawngzawhtute hian Manipur sorkar an demna thu te, UNC hruaitu chhuah an phutna thuziak te an keng a ni.