Infiamna hmunpuiah Guwahati siam tum a ni : Sonowal

Assam Chief Minister Sarbananda Sonowal chuan Assam khawpui Guwahati chu infiamna hmunpuiah siam tum a ni, a ti.

CM Sonowal hian Nilaini khan 1st Elite (Senior) Men’s National Boxing Championship 2016-17 chu Karmabir Nabin Chandra Bordoloi Indoor Stadium, Sarusajai Sports Complex-ah a hawng a, he thu hi a sawi a ni. Sonowal chuan Guwahati chu hmarchhak mai ni lo, ram chhunga infiamna khawpui pawimawhah siam tum a ni, a ti. Hmarchhak
ṭhalaiten talent an neih ṭhat thu sawiin, infiammite chu ram pum huap leh khawvel huap pawha pholang turin a kaihhruai sorkar chuan hma a la mek niin a sawi.

Assam chuan kum 2017-ah Under 17 FIFA World Cup a thleng dawn tih sawiin, tun hnaiah India Myanmar Thailand (IMT) car rally an thlen thu a sawi a. Traditional sports leh culture tih hmasawnna turin Brahmaputra Festival buatsaih a ni tur thu a sawi bawk. Boxing Federation of India (BFI)-in Assam khawpuia Men’s National Boxing Championship 2016-17 a nghat chu lawmawm a tih thu sawiin, state sorkar chuan a thlawp thu a sawi. Assam CM chuan hmarchhak
aṭanga boxer langsar Mary Kom, Shiva Thapa, L. Sarita Devi leh Devendro Singh-te chu ṭhalai kum naupang zawk ten entawn thei se a duh thu a sawi bawk.

1st Elite (Senior) Men’s National Boxing Championship 2016-17-ah hian boxer 600 vel an tel a, national boxing camp-a tel tur thlanna neih nghal a ni ang.