Arunachal : Forest Minister-in thihna thlentu sakei man phalna thupek tichhuak

Arunachal Pradesh forest minister Wanki Lowang chuan Lower Dibang Valley district-a mihring seh hlumtu sakei man phalna thupek a tichhuak.

February 2 zan khan Mehao Wildlife Sanctuary-a Roing-Mayodia kawng dungah sakeiin constable Chikseng Manpang, Namsai district, Manfaiseng khaw mi duty haw lam chu beiin Manpang hi a thi a ni. He thil thleng vang hian Minister chuan Department of Environment, Forest & Climate Change senior officer-te review meeting a neihpui a ni.

Minister Lowang chuan mihring nunnain a tawrh phah chu pawi a tih thu leh, mitthi chhungte a tuarpui takzet tih a sawi. Veterinary team-te leh wildlife specialist-te chu helai hmunah hian tirh an ni tawh a, anni bakah STPF guard-te leh field staff-te pawh a ṭul ang thawk tura tirh an ni tih a tarlang. Technical expert committee din a ni dawn tih sawiin, ram chhung dan angin sakei man phalna thupek chu a siam tih sawiin, man a nih hnuah enkawl zui a ni ang, a ti.

Lowang chuan a hranin department chuan mitthi chhungte hnenah zangnadawmna, Rs nuai 10 pekna tur ruahmanna a siam tih a sawi. Mihring himna ngaih pawimawh a nih rualin mawhphurhna hrethiam chungin ramsa enkawl a pawimawh tih a sawi bawk.