Manipur : Nawrh huaihawtten lirthei an hal vangin curfew puang

Manipur-a United Naga Council (UNC)-te'n inkal-pawhna kawngpui pawimawh, National Highway an dan chah duh lohna lantira nawrh huaihawt-te'n buaina an siam avangin Imphal East district-ah curfew puan a ni.

Imphal East district-a nawrh huaihawtute hian Pathianni khan car 22, bus leh lirthei dang eng emaw zat an hal a, he thil thlen hnu hian curfew puan zui nghal a ni. Lirtheite hi kawngpui dungah hal an ni a, armed police leh paramilitary force-te chuan he lai hmun hi an pan nghal a, mipuite chu tear gas hmanga hnawhdarh an ni. Nawrh huaihawt zinga mi A. Rajen chuan, "UNC-te'n hun rei tak chhung NH an dang chat hi kan dem tak zet a, hemi titawp tur hian state sorkar leh sorkar laipui chuan hma an la chak tawk lo a ni. Nitinin mipuite tawrhna a nasa zual zel a, kan dinhmun a chhe tawh tak zet a ni" tiin sorkarin hma a la chak tawk lo chu an dem thu a sawi.

He thil thlenna hmun hi 2nd Manipur Rifles battalion chuan pan ve nghalin, chhanchhuah hna an thawk a, passenger hliam tur eng emaw zat an awm. Passenger za chuang zet chu he lai hmunah hian an tangkhang a, hliam tuarte chu hospital panpui an ni. Nagaland Chief Minister TR Zeliang chuan he thil thleng hi pawi a tih thu sawiin, Manipur sorkar hnenah Imphal valley-a Naga chengte himna ngaihtuah sak turin a ngen. Hei bakah hian Zeliang chuan Manipur buaina chungchangah Union Home Minister, Rajnath Singh chu lehkha thawnin, buaina chinfel a nih theih nana sorkar laipui inrawlh thuai turin a ngen.

Manipur-ah hian kar kalta Inrinni aṭang khan hmeichhe pawl hrang hrangte chuan UNC-te hmalakna an thlawpna lantir nan leh, venhimhna thawktu police-te lambun an nih duh lohna lantirin nawrh an huaihawt ve leh. Hei hian lirthei che vel a tibuai nasa hle a, a tam zawk chu kawngpui dungah an tangkhang a ni. Hetih lai hian Imphal East-a Bongyang khuaah pawh inkahna thlengin, he khuaa Biak-In eng emaw zat chu beih a ni. Bongyang hi Kuki-te chenna a ni a, he hmunah hian tun hnai khan police-te chu lambun an ni a, mi pali an thih bakah mi dang 14-in hliam an tuar a ni.

Boruak a ṭhat loh avang leh, buaina a punlun zel avangin kar kalta Inrinni khan cabinet meeting chuan dan leh thupek khauh zawka kenkawh a nih theih nan internet service titawp lailawk turin thupek a lo chhuah tawh a ni. Social media hmanga nasa taka thu thehdarh a nih ṭhin avangin, District Magistrate-te chu district tinah internet service titawp turin cabinet chuan a rel a ni. Media kaltlanga thudik lo vawrhdarh a hluar bakah, Kristian-te Biak-In thlenga suasam a nih avangin Manipur dinhmun hi a ṭha lo hle. Pawl hrang hrangte chuan sorkar laipui a inrawlh vat lo chuan buaina a punlun zel an hlauh thu leh, hnam hrang hrangte inkarah buaina a chhuah an hlauh thu te, kum 1990 vela mi 1,500 dawn thihna thleng ang kha a thlen leh an hlauh thu an sawi.