Assam sorkar-in joint coordination panel din

Assam state chhungah rel tlanin sai a sut hlum leh tak avangin, ramsa te himna tur ngaihtuah turin state sorkar chuan joint coordination committee din a nih tur thu a puang.

Pathianni khan Forest Department aiawh leh North-east Frontier Railway aiawhte chuan meeting an nei a, Chief Minister Sarbananda Sonowal-an a kaihruai a ni. Joint coordination committee-ah hian Forest Department leh Railways aiawh te an tel dawn a, anni hian hma an la dawn a ni. Kar kal ta chhung khan Assam-a Nagaon district-ah sai pathum relin a su hlum a, hei vang hian state sorkar chuan ramsa te himna tura chak zawka hma lak a rel ta a ni. He thil thleng chungchangah hian state Forest Minister Pramila Rani Brahma chuan forest department chu Railways lakah thubuai ziaklut turin a hriattir bawk.

Sai pathumte hi Poti-yapam area-a kawng an kan tur chu rel hian a su a, a hmunah an thi nghal a ni. Railways chuan ramsa te chenna huamchhungah rel tlan chak theih zawng a bithliah a, darkar khatah km 40 aia chaka tlan phal a ni lo. Hetih lai hian forest deparment leh railway lama thawktute thawhhona a ṭhat tawk loh avangin chetsualna hi a thleng fo nia sawi a ni. Tun ṭuma chetsualna thleng chungchangah hian North East Frontier Railway lam chuan Jamunamukh leh Kampay station-ah tlanchak theih chin bithliah a awm lo niin an sawi.

Assam CM Sonowal chuan Forest Department leh NFR-te chu hetiang thil a thlen tawh lohna tura thawhhona ṭha zawk nei tura a duh thu sawiin, ramsa te himna ngaih pawimawh a ṭul thu a sawi a ni.