Carbon Neutral District-ah Majuli siam tum

Assam sorkar chuan Brah-maputra thliarkara awm Majuli district chu India rama Carbon Neutral District hmasa berah siam tura hmalak a nih thu a puang.

Majuli-ah hian Environment & Forest chuan project Sustainable Action for Climate Resilient Development in Majuli (SACReD, Majuli) a kalpui mek a, hei hi Carbon Neutral District-a puan a nih theih nana hmalakna peng pakhat a ni. State sorkar chuan ruahmanna hrang hrang a kalpui mek a, French Development Agency leh Assam Project on Forest and Biodiversity Conservation (APFBC) te chu a thawhpui mek bawk. SACReD project hi kum thum chhung kalpui tura ruahman a ni a, kum 2020-ah chuan Majuli chu Carbon Neutral District-ah puan hman beisei a ni.

Majuli hi Brahmaputra thiarkara awm a ni a, chief minister ni lai Sarbananda Sonowal-a bial a ni. Assam-a BJP a sorkar hnuah district-ah hlankai niin, kumin khan khawvela 'River Island' lian berah puan a ni. Majuli Island zau zawng hi sq km 1,250 a ni a, Brahmaputra lui leh Subansiri lui infinin a siam a ni a, Assam khawpui Guwahati aṭanga km 200 vela hla a ni.