CAB : Assam buainain zual lam pan zel AASU-in Supreme Court-ah petition thehlut dawn

Parliament in hniha pass tak, Citi­zenship (Amendment) Bill duh lohna lantir vanga Assam-a buaina chhuak chuan zual lam a la pan zel a, rel leh thlawhtheihna service pawh a buai phah hle. Curfew puan ni mah se nimin khan nawrh huaihawt chhunzawm a ni. 

Buaina chhuak vang hian Nilaini zan khan Assam sorkar chuan Guwahati-ah curfew a puang a, district dang 10-ah mobile internet a titawp bawk a, CrPC section 144 hman a ni bawk. Nimin khan All Assam Students' Union (AASU) leh KMSS chuan curfew puan ni chungin nawrh an huaihawt chhunzawm. Guwahati-a Latshil playground-ah inkhawm an ko a, kal an ṭhahnem hle. He hunah hian film leh music industry lama mi lar tak takte pawh an tel a, college leh university zirlaite an kal ṭha hle.  

Nawrh huaihawtte hian state chhung hmun hrang hrangah dawr leh inte an suasam bakah motor-te an hal a,  BJP leh AGP hruaitu eng emaw zat in an bei tel bawk. Nimin khan Dibrugarh, Sadya leh Tezpur-ah RSS office beih a ni a, Tezpur-a BJP office pawh beih tel a ni bawk. 

Guwahati-a Lalung Gaon area-ah chuan nawrh huaihawtte hian police-te chu lungin an tawng a, police-ten silai an hmetpuak a ni. Police-te silai hmehpuahah hian nawrh huaihawt zinga paliin hliam an tuar. Khawpui chhung hmun dangah pawh mipui pungkhawmte hnawh darh nan hian police-te chuan van lam hawiin silaite an hmetpuak a ni. 

Buaina chhuakin zual lam a pan zel avangin nimin khan Guwahati police hotu chu thlak a ni. Guwahati police commissioner Deepak Kumar chu thlakin, a aiah SPG officer Munna Prasad Gupta dah a ni. Assam-ah sipai ṭhahnem tham tak thawn luh an ni tawh a, nimin zing khan sipaite hian Guwahati khawpuiah leh Tinsukia, Jorhat leh Diburgarh-ahte flag march an nei. Assam-ah hian sipai 5,000 dawn dah luh an ni. 

AASU chuan Parliament-a pass tak, CAB khinna tur chu Supreme Court-ah thehluh an tum tih a sawi. AASU advisor Samujjaj Bhattacharya chuan prime minister Narendra Modi leh chief minister Sabarnanda Sonowal-te chuan Assam mipuite an phatsan ta nia an ngaih thu a sawi. 

Duh lohna lantirtute hian Nagaon MLA Rupak Sarmah chenna in chu lungin an vawm tih report a awm a, Rajya Sabha BJP MP Bhubaneswar Kalita chenna in Guwahati-a mi pawh an hual bawk. Borsola MLA Ganesh Limbu chenna in pawh duh lohna lantirtute hian an hual a ni.

Assam District 10-a mobile internet tihtawpnaahte hian nimin chhun dar 12 aṭang khan darkar 48 dang tihtawp chhunzawm a ni dawn. Internet hi Lakhimpur, Dhemaji, Tinsukia, Dibrugarh, Charaideo, Sivasagar, Jorhat, Golaghat, Kamrup (Metro) leh Kamrup-ahte tihtawp a nih thu Additional Chief Secretary (Home and Political department) Sanjay Krishna chuan a sawi.

Assam thuneitute chuan December 22 thleng nawrh huaihawt vang hian school zawng zawng khar chhunzawm a ni dawn tih an puang.

"Tumahin in chanvo an laksak dawn lo che u" Prime minister Narendra Modi chuan Assam-a CAB dodalna lantira nawrh huaihawt mekte chu inbengdai tura ngenin, tumahin state leilung fate chanvo chu an laksak dawn lo tih a sawi.

PM Modi chuan a twitter-ah ngenna hi ziakin, Assam mipuite chuan CAB pass vangin engmah hlauhthawn tur an nei lo a ni, a ti.  An chanvo, identity leh culture-te chu tumahin an laksak thei dawn lo a, a la ṭhangduangin a vul zel zawk dawn a ni tiin a sawi. 

A kaihhruai sorkar laipui chuan Assam mipuite political, linguistic, cultural leh land rights-te chu a humhalh sak tlat dawn a ni, a ti. Hetihlai hian Congress party chuan PM-in a twitter kaltlanga Assam mipui­te ngenna a siam hi an lo chhang el nghal a, nawrh huaihawt vangin Assam-ah internet tihtawp a ni a, hei vang hian state mipuite chuan a thuchah chuan an lo hmu thei dawn lo tiin an sawi. 

Assam chief minister Sarbananda Sonowal pawhin mipuite chu inbengdai tura chahin, "Kan cultural, social leh spiritual tradition-a kan lo neih tawh angin, Assam mipuite chuan an tihdan pang­ngai ang bawkin, remna leh muan­na an kalpui leh ka ring a ni," a ti.

Prime minister Narendra Modi leh home minister Amit Shah-te chuan Assam humhimna   turin Assam Accord clause 6 chu an kalpui ngei dawn tih a tiam bawk. Mi ṭhenkhatin thuthang dik lo thehdarhin mipui rilru an hruaikawi nia sawiin, mi maktaduai 10-15 velin Assam-ah khua leh tui nihna an nei dawn tih an sawi a, hei hi thu dik lo a ni, a ti.