Meghalaya : East Jaintia Hills-ah dan loa lungalhthei khur siam khap

Meghalaya-a East Jaintia Hills district thuneitu chuan Thangsko huam chhungah dan loa lungalhthei khur siam khapna thupek a tichhuak. Meghalaya High Court thupek zawmin February 7 khan tihchhuah a ni a, dan loa lungalhthei khur siamnaa inhnamhnawihte lakah rang taka hma la turin a ngen. District magistrate Manish Kumar chuan hnathawhna atana lirthei leh khawl an hmante pawh man vek turin thupek a chhuah a ni.

High Court thupek zawmin district thuneitute chuan Thangsko-a dan loa lungalhthei khur neitu, a enkawltu, sum enkawltu leh midang inhnamhnawih hrechhuak tur leh man turin tualchhung police-te pawh an hriattir a ni. He hmalakna hi dan loa lungalhthei khura hnathawhna network titawp tura hmalakna a ni bawk.

Thuneitute chuan enforcement protocol tihchangtlun an rawt bawk a, magistrate-te chu helai huam chhungah hian khauh taka hmala tura hriattir an ni. Thangsko chu endik fo tura tih an nih bakah, dan bawhchhiate chu Mines and Minerals (Development and Regulation) Act hnuaiah thubuai siamsak an ni ang. Thuneitute chuan an hmalakna kalpui turah hian a inhnamhnawih mai bakah, lungalhthei laih chhuahna atana hmanrua an hmante pawh an man vek dawn tih an sawi.

District magistrate Manish Kumar chuan tualchhung mipui aṭangin complaint an dawn fo thu a sawi a, social media lamah pawh helai hmunah hian dan loa lungalhthei khur laihchhuahna a la awm reng tih sawilan a ni fo tih a tarlang. Dan loa lungalhthei khur siam tihtawpna turin dan thar an siam chu khauh takin kalpui a ni dawn tih thuneitute chuan an tarlang.