Manipur : CM-in state economy review meeting kaihruai

Manipur chief minister thar, Yumnam Khemchand Singh chuan February 7, Inrinni khan state puma Integrated Farming System (IFS) tihhmasawn chungchangah high-level review meeting a kaihruai. Meeting hi Chief Minister Secretariat Cabinet Hall-ah neih a ni.

Meeting-ah hian chief secretary Dr Puneet Kumar Goel, additional chief secretary Vivek Kumar Dewangan, commissioner to the chief minister N.Ashok Kumar, Horticulture and Soil Conservation director K. Devdutta Sharma, Agriculture director Peter Salam leh senior official dangte an tel.

Manipur-in agriculture leh horticulture-a theihna a neih hmanga economy tihhmasawn dan tur ngaihtuah ho a ni. Chief Minister chuan loneitute sum lak luh tihpun leh thingtlanga eizawnna tihchakna atan thlai chin leh a kaihhnawih hmanga hma la turin department a hriattir bawk a ni.

Sawi hona an neihah state-in agriculture leh horticultural product ram pawna thawn chhuah a tum dante pawh zirchian a ni. Market zau zawka inzarpharh chu economy ṭhanlenna atan a pawimawh thu an tarlang. Official-te chuan lo neih bakah ran vulh, sangha khawi, leh horticulture nen inzawmkhawmna tur ruahmanna hrang hrang an sawi ho bawk. CM chuan integrated farming chu hun rei tak daih economy chawikanna atan a pawimawh bakah hnathawh tur tam zawk a siam dawn a ni, a ti.