Manipur-ah ILP system hmang ṭan ta

Union home minister Amit Shah-a'n Manipur state-a Inner Line Permit (ILP) system hman a nih tur thu a puan aṭanga ni hnih hnuah, Nilaini khan President Ram Nath Kovind chuan thupek tichhuakin Manipur-ah ILP system hman ṭan nghal a ni. 

Sorkar laipuiin Citizenship (Amendment) Bill kalpui a tumnaah hmarchhak state hrang hrangte an lungawi lo a, hemi hnu hian draft ṭhain hmarchhaka ILP hmanna leh tribal area-te huam tel lo turin a siam ṭha leh a ni. Manipur state hi ILP hman a la nih loh avangin chawpchilh takin Manipur-ah ILP hman a ni dawn tih Lok Sabha inkhawmah Amit Shah chuan a puang zui nghal bawk. 

Manipur-a hman a nih ve leh tak avangin hmarchhak state pali-ah ILP sytem hi hman a ni ta a ni. Manipur hma hian Arunachal Pradesh, Nagaland leh Mizoram ten an lo hmang tawh bawk. ILP system pek an nih avang hian Thawhlehnia hmarchhak zirlai pawl intelkhawm, North East Students' Organization (NESO)-in hmarchhak puma nawrh an huaihawt pawh khan Manipur-ah chuan ṭhulh a ni a, BJP kaihhruai sorkar chuan ILP system lawm­na inkhawm hi a buatsaih zawk a ni.