Assam : Congress President-in CM laka action lak a phut

Assam Congress president Gaurav Gogoi chuan chief minister, Himanta Biswa Sarma chu Muslim te huatna chawk tho zawnga thiltiah puhin, a laka action la turin police a phut.

Nimina press conference a neihah, Gogoi chuan tun hnaia state BJP-in X-ah CM video an dah, a hnuah a delete leh tak chungchang a sawi chhuak. Video an edit-ah CM hian rifle-a Muslim mi pahnih a tin lai tihlan a ni. A hnuah video hi paih leh nghal mah se, sawi zui a hlawh hle.

Gogoi chuan video hmang hian CM chaun Muslim te huatna a chawk chhuak a ni tiin, police-te chu CM thiltih dan chu chhui chiang a, hma la turin a phut tih a tarlang. CM chetdan chu minority-te bei tura mipui fuihna a ni, a ti. Congress thupuangtu, Supriya Shrinate pawhin court leh institution dang pawhin CM video, a caption-a 'point blank shot' tih an hman an ngaihven zui lo chu mak a tih thu a sawi ve bawk. CM chu bang tur leh, a thiltih danah ngaihdam dil turin Congress chuan an phut bawk.

BJP chuan CM video chungchanga sawiselna hi an la chhang let lo. Video hi February 7-a an post kha a ni a, mahse reilote hnuah an la thla leh nghal a ni.