Assam-a airshow neih tur PM-in enpui dawn

Prime minister Narendra Modi chu vawiin, Februay 14 hian Assam a tlawh dawn a, airshow neih pawh a hmanpui a nghal ang. PM hian hmasawnna project hrang hrang; inthlunzawmna, digital infrastructure, higher education leh urban mobility, Rs vbc 5,450 chuang senna tur a tlangzarh dawn bawk a ni.

PM hian vawiin dar 10:30 velah Emergency Landing Facility (ELF), Moran Bypass, Dibrugarh a thleng dawn a; fighter aircraft, transport plane leh helicopter-ten aerial display an entir chu a hmunah a en dawn a ni.

ELF hi hmarchhak biala a hmasa berna ni turin Indian Air Force thawhpuinaa din a ni. Dual-use infrastructure anga duan a nih avangin emergency-a sipai leh civil thlawhtheihna ṭum leh thlawh chhuahna atan a hman theih dawn a ni. Facility hian fighter aircraft ton 40 thleng a dawl zoa, transport aircraft ton 74 thleng a dawl zo bawk.

Chawhnu lam dar 1-ah Prime Minister hian Brahmaputra lui kama Rs vbc 3,030 senga Kumar Bhaskar Varma Setu sak thar a tlawh dawn a ni. Six-lane extradosed Prestressed Concrete (PSC) lei hian Guwahati leh North Guwahati a thlunzawm a, India hmarchhak biala hetiang lei dawh sak hmasak ber niin, zin veivah hun chhung pawh minute sarih vela a tihtlem theih beisei a ni. Chhiatna thleng tur hriat lawk theihna Bridge Health Monitoring System (BHMS) hman a ni bawk.

Hemi hnuah PM hian Lachit Ghat, Guwahati-a project hnathawh hrang hrang a hawn dawn bakah a vailiam bawk ang. Project hawn tur pawimawh zingah Amingaon, Kamrup district-a National Data Centre for the Northeastern region pawh a tel. Prime Minister hian Indian Institute of Management Guwahati campus a hawng dawn bawk.

Prime Minister hian PM-eBus Sewa Scheme hnuaiah electric bus 225 a vailiam dawn bawk a, e-Bus hi mipui nuai 50 chuangin an hmang ṭangkai thei dawn niin an chhut.