Arunachal CM-in Tawangchu Tides International Kayaking Championship vailiam

Arunachal Pradesh chief minister Pema Khandu chuan February 12 khan Tawangchu River-ah 2nd Tawangchu Tides International Kayaking Championship a vailiam. Championship-ah hian India ram chhung leh ram pawn lam aṭangin infiammi 100 chuang an tel.

Chief Minister chuan infiammi telte chungah lawmthu sawiin, Arunchal Pradesh lui hrang hrangte chu kayaking leh canoeing tihna atana ṭha tak tak an nih thu a sawi. An state chu adventures sport atana hmun ṭha tak a ni tiin, Arunachal Kayaking & Canoeing Association (AKCA) in liu pangate training hub-a siam tura rawtna an thlen thu pawh a sawi bawk. State sorkar chuan technical expert leh Indian Kayaking & Canoeing Association (IKCA) te thawhpuiin, adventure sport chawi larna turin training centre tam zawk siam a tum tih a sawi lang bawk.

Infiamna lama tihhmasawnna tura hma an lak thu leh, hlawhtlinna pawh an chan chhoh zel thu Chief Minster chuan a sawi. 'Ram pum huapin infiamna lamah Arunachal Pradesh chu a hniam ber a nih lai pawh a awm. Mahse tunah chuan 38th National Games ranking-ah hmarchhak bialah chuan pahnihna niin Manipur dawttu kan ni tawh a ni," a ti. 39th National Games neih turah pawh an state-in hmasawnna an hmuh ngei a ring thu a sawi bawk.Infiamna lama hma an sawnna chu sorkarin youth development, sports policy leh infrastructure lama investment a tih ṭhat veang a ni, ati. Kum 10 chhungin an state chuan national leh international levelahah infiamna hrang hrangah medal 1,000 chuang a la ni, a ti.