Meghalaya : Lungalhthei khur puak chhui chiang turin Judicial commission din

Meghalaya-a East Jaintia Hills district-a kumin February 5-a lungalhthei khur puaka mi 31 thihna chhui chiang turin member pathum awmna, judicial commission din a ni. Commission hi High Court judge (retd) R.S. Chauhan chuan a kaihruai dawn a ni.

Panel hi Commission of Inquiry Act, 1952 hnuaia din a ni a, February 14-a thuchhuah siam angin dan loa siam lungalhthei khur puak hi anchhuichiang dawn a ni. IPS officer pension tawh H. Nongpluh leh IAS officer hlui P.S. Dkhar-te chu judicial commission member atan ruat an ni. Justice Chauhan hi tunhnai khan Uttarakhand leh Telangana High Court-ah Chief Judge a ni. Commission hi Thangsko, Mynsngat khuaa dan loa lungalhthei khur siam puah chhan uluk zawka chhui tura ruat an ni.

Commission chuan an thil hmuh chhuah leh rawtna an neihte chu sttae sorkar hnenah thla ruk chhungin an theh lut dawn a ni. Panel hian a bulṭhut aṭangin Meghalaya-a dan loa lungalhthei khur siam a nih chhan an chhui bawk dawn a, industry-a hnathawkte dinhmun an thlithlai bawk ang. Hei bakah kum 2014-a National Green Tribunal-in lungalhthei khur siam a khap avanga harsatna tawkte tana hmalak dan tur, inrelbawlna siamṭhat, leh financial rehabilitation scheme a siam bawk dawn a ni.