Sikkim : Tibetan thla serhah ran talh khap dawn

Sikkim chuan kumin February 18 aṭanga March 18 thleng ran talh khapna thupek a ti chhuak. Hemi hun chhung hi Tibetan lunar calendar-a thla hmasa ber niin, Buddhist sakhaw danah ṭawngtaina leh tharum thawhna tel loa hun thianghlim hman hun a ni.

Thla khat chhung ran talh khapna thupek hi state-a Ecclesiastical Affairs Department siam niin; ar, ran vulh leh sanghate a huam a ni. Sa zawrhna dawr pawh khar vek turin hriattirna tihchhuah a ni bawk. Hemi rual hian loh theih loh thil, inneih leh thil lawmna dang atana hman tur leh, sahuana ramsa awmte pek turte chu Department aṭanga phalna lain state pawn aṭanga lak luh phalsak an ni ang.

Khapna in a huam chhunga sa talh lui emaw, zuar emaw mante chu Rs 1,000 zel chawi tir an ni dawn a ni. Khapna thupek hi khauh taka kenkawh a ni dawn a, police-te bakah tualchhung thuneituten an endik reng dawn a ni.

Thla serh chhung hian state-a monastery 111-ah sakhaw thil buatsaih a ni dawn a; puja, butter lamp offering, chanting ceremony leh ṭawngṭai hona neih a ni ang. Hetiang hun hi Bhutan leh Tibet-ahte hman a ni bawk ang.